Institut d'Estudis Occitans                                              de Gard

Del 10 al 16 d'agost, a Vilanòva d'Òlt, se debanava l'Escòla Occitana d'Estiu, un crane eveniment que recampa un fum d'apreneires originaris de pertot en Occitània e de mai luènh ! 

Aqueste an (2025), èrem 4 originaris de Gard per assegurar de corses de lenga ! 

Per aver una idèa mai precisa de l'EOE, aqui qualques linhas de bilanç : 

Passar la pòrta del licèu L’ostal a la debuta de l’EOE es un pauc dintrar dins un monde parallèl ! Un polit sòmi ont l’occitan es la lenga de comunicacion per totes, pichons o mai vièlhs, de Catalonha o d’Oxford, sèm totes recampats per aquelas valors.

Dins una setmana d’estagi ont los oraris son una necessitat tecnica, cada moment de la jornada ven una mena de ritual, lo cors del matin, manjar amassa, la conferéncia de vesprada, l’aiòli de l’aperitiu del ser en ausissent las còlas d’afogats cantar de polifonias gasconas.

Dins los corses de lenga, seriós e aplicacion, mas tanben creativitat per poder aprestar una produccion originala lo dijòus a la serada dels estagiaris ! Pichons e ados, plan encadrats tanben per la còla volontosa d’animators auràn jogat, creat, collaborat dins la lenga nòstra.

De segur lo calimàs nos aurà pas esparnhats, e los balètis, amai amb la clim, nos auràn daissats totes susents, e arrenduts, mas aüroses del moment partejat. Cadun i trapa sa plaça, causís las activitats que mai li fan enveja : jòcs, cultura,cosina, art, musica, espòrt, ben èsser… ne vòls ? Aquí n’as !

E una pensada per la còla que se bolega per far d’aquel sòmi una realitat : totes los benevòls, plens d’idèa e de vam, que vos coconejan ! Foguèt un brave regal per ieu de descobrir aquel ambient de l’EOE per lo primièr còp.

Sembla que lo segond cinquantenari de l’EOE es plan endralhat… demòra pas pus que d’esperar l’an que ven !

Estela Mazodier

L’IEO 30 es una association loi 1901. Sa tòca es d’assegurar la promocion e la continuitat de la cultura e de la lenga occitanas. Participa al CA de la seccion regionala IEO Occitània - Pirenèus Mediterranèa.

 Aquela associacion prepausa :
* De conferéncias : Cicle « Charradissas »
* Un cicle « Pergamins per camins »: rescontres entre autors e legeires.
* Un estagi de teatre per los joves en occitan
* D’espectacles ò de concerts per enfants ò adultes (ajuda a la creacion)
* D’accions de valorisacion de la lenga : senhalisacion, emissions de television e de radiò.

L'IEO 30 es una associacion a tòca non lucrativa, pòt viure gràcias als escotissons de sos aderents e a las subvencion de las collectivitats localas que mercejam : Vila de Nimes, Conselh general de Gard, Ofici Public de la Lenga Occitana.

Escotisson en 2025



Escotisson: 30 € individual // 12 € indiviual tarifa redusida (estudiants, caumaires, personas que pagan pas l'impòst sus lo revengut)

e 40 € coble // 16 € coble tarifa redusida  (estudiants, caumaires, personas que pagan pas l'impòst sus lo revengut)

Associations e persona morala : 50 €

amb l' abonament a la revista "Anem ! Occitans"

Ligam cap a Hello Asso per aderir

L'IEO Occitania Pirenèus Mediterranèa prepausa son jornal LO DIARI en linha e version papièr sus abonament : legir lo Diari

L'IEO 30 es signatària del contracte d'engatjament republican de las associacions : document çai-jos.